Buscar este blog

viernes, 10 de octubre de 2014

1ª Xornada Técnica de Pesca Deportiva e Medio Natural do Concello de O Pino

A primeira xornada do medio natural e da pesca deportiva de O Pino deu a coñecer e divulgou os valores deportivos e sociais que ten a pesca deportiva, o potencial que atesouran as augas continentais e a relación co medio ambiente.
Durante toda a xornada, pasaron pola Lagoa da Magdalena (Santiso-O Pino) unhas cen persoas chegadas de diversos lugares de Galicia (Vigo, Ferrol, Valdoviño, A Coruña, Santiago, Narón, Abegondo, Lugo...) Incluso se achegou o adestrador de fútbol, o lugareño Fernando Vázquez, pero declinou botar uns lances.
Comezou a xornada coa introducción do escritor Miguel Piñeiro quen, ademáis, fixo a presentación dos relatores e artesáns.
A primeira ponencia do día foi a cargo do Director do Xornal Trueiro, Alberto Torres, reparando no papel da prensa na defensa do medio ambiente.
O relator da Lei de Pesca de Galicia, Pepe Casal, foi moi ilustrativo na súa ponencia “Pesca e Deporte”, amosando as diferentes modalidades e técnicas de pesca.
A continuación, o profesor da USC Fernando Cobo ilustrou aos mais cativos na significación e na importancia da biodiversidade.
Acto seguido, os participantes se trasladaron ao Río Mera onde tres biólogos da Estación de Hidrobioloxía Encoro do Con impartiron unha clase práctica a pe de río.
Xa de volta, foi a quenda dos “Artesáns da Pesca” Paco Porto, Oscar Gayoso, Eloi Saavedra, Suso Vilar e Alberto Mera, quenes puxeron sobre o torno un Obradoiro de señuelos e complementos de pesca con moscas para troita, reo, salmón e reclamos para pesca no mar. Suso Vilar explicou os pasos para confeccionar unha cana de bambú.
Logo do xantar na área recreativa, o Campión Mundial de Salmónidos-Mosca en Eslovenia 2012, o coruñés David Arcay impartíu un Clinic de lance.
Como colofón á xornada, todos, especialmente os cativos, disfrutaron da pesca na lagoa.
Os axentes do Servizo de Caza e Pesca Julio Gigirey e Jesús Blanco velaron pola utilización dos anzóis sen arponciño e pola correcta manipulación e devolución das troitas á auga.
A destacar a impecable organización da Secretaría Técnica, coordinada por Raquel Sánchez Mella, que dispuxo un operativo moi complicado: carpas, autobús, comidas, etc. Noraboa, Raquel.
Durante toda a xornada, as evolucións dos participantes e as actividades foron seguidas atentamente polo Alcalde de O Pino, Manuel Taboada Vigo, que tamén é pescador, e polo tenente Alcalde Manuel Canabal.





























viernes, 3 de octubre de 2014

1ª Xornada Técnica de Pesca Deportiva e Medio Ambiente




Concello de O Pino

Sábado 4 de outubro de 2014

Sinopse
Esta primeira xornada de achegamento do medio natural e da pesca deportiva de O Pino ten a finalidade de dar a coñecer e divulgar os valores deportivos e sociais que ten a pesca deportiva, o potencial que atesouran os ríos e a nosa relación co medio ambiente.
Nesta primeira experiencia, por falla de tempo e premura de calendario, tentaremos de debullar en liñas xerais a significación do medio natural, a senlleira importancia dos cursos fluviais e a interrelación entre o medio natural e os humanos.
Non se pode, tendo en conta o programa e os horarios, afondar en materias sesudas ou de profundo predicamento científico, trátase de achegar e dar a coñecer a biodiversidade das augas continentais, de incidir nas vantaxes que nos reporta o medio natural e, como actividade inherente, tratar o mundo da pesca dende a perspectiva da súa modalidade máis conservacionista, responsable e sostible, como é a pesca sen morte.

Programa


10:00 h.- Ponencia “Auga, contaminación e denuncias”
               Por Alberto Torres, Xornalista             
10:15 h.- Ponencia “Pesca e Deporte”
               Por Pepe Casal, Relator da Lei de Pesca de Galicia   
10:30 h.- Ponencia “Conservación dos ríos”
               Por Fernando Cobo, Biólogo e Profesor da USC
10:45 h.- Traslado ao río Mera
11:00 h.- “Ríos, biodiversidade e conservación”
               Clase práctica para os cativos a cargo dos biólogos da Estación de 
               Hidrobioloxía Encoro do Con
11:00 h.- Obradoiro de Pesca, a cargo dos “Artesáns da Pesca” Paco Porto,  

               Oscar Gayoso, Eloi Saavedra e Alberto Mera.
               (moscas para troita, reo, salmón e reclamos para pesca no mar)
13:00 h.- Confección dunha cana artesanal de bambú a cargo do Artesán Suso Vilar
14:00 h.- Xantar
16:00 h.- Clinic de lance a cargo de David Arcay
               Campión Mundial de Salmónidos-Mosca en Eslovenia 2012     
17:00 h.- Pesca técnica na Lagoa da Magdalena
               Metodoloxía protocolaria da captura e solta dos peixes
20:00 h.- Clausura a Xornada Manuel Taboada Vigo, Alcalde de O Pino